رستے میں تو صحرا ہے ،گلزار مدینہ ہے
گھر ہے شہ شاہاں کا،شہکار مدینہ ہے

اک بار کھلی آنکھوں، طیبہ کی زیارت کی
اب چشم تصور میں، ہر بار مدینہ ہے

پھر تازہ وضوکر لو ،ہے حد حرم نزدیک
چند ایک پہاڑیوں کے ،اس پار مدینہ ہے

تھا عہد ،ہمہ تن گوش اصحاب اور ان کے بیچ
آقا صلى الله عليه وآله وسلم میرے بیٹھے ہیں ،دربار مدینہ ہے

پھلواریاں پھولوں کی طیبہ میں تکلف ہیں
چو گرد ہے روضے کی مہکار ، مدینہ ہے

میں میں نہیں رہتا ہوں یکسر ہوں بدل جاتا
دل وجد میں آیا ہے ،سر شار مدینہ ہے

وہ شہر ہے پاکیزہ ،آسودگی خندہ رو
اللہ کی رحمت کا اظہار مدینہ ہے

دن کو بھی ہے اک رونق، شب کو بھی ہے آب و تاب
آٹھوں ہی پہر یعنی بیدار مدینہ ہے

بیانی ،بہت شہروں کا دہر میں شہرہ ہے
پر سر پہ فضیلت کی دستار مدینہ ہے